بالعشرينات چان اكو فلاح فطير و من اهل الله عنده زمال ( مكرم القارئ ) يحمل عليه ويكرب عليه بقرية بعيدة …

فد يوم الحكومة بدت تبني مدارس بالارياف ، و مر صاحبنا الفلاح على العمال ، جاي يبنون بمدرسة ، سألهم بوية شتبنون شنو هاي البنايه ؟؟گالوله عمي نبني مدرسة ، گال وعود شنهي هاي المدرسة ؟؟؟،
گلوله هاي المدرسه فد شي تسوي الزمال آدمي ،، گاللهم هاااا ، گالوله مثل ما نگلك عمي ،،
گال زين.، يعني.هسه ، هذا ابو صابر المْطَيْ( تكرمون) مالتي من أخليه يمكم يصير آدمي !؟؟؟ لان مدوخني يعض ويزگط وصعب فرد نوب ،،
ذولة العمال شياطين ، واحد ندس الثاني ، گاله ، ولك خلي يجيبة نحمل عليه ونگضي بيه شغل ، ونستفاد براسه…..
گاله اي عمي خلي المطي(تكرم) مالتك يمنه وانت روح ،
عافه يمهم وراح ، ذوله خلصو شغل بابو صابر وكملت المدرسة وبعدين باعوه و أكلوا فلوسه وراحوا ،
وره خمس سنين ، ستة ، صاحبنه اتذكر الزمال مالته ، گال خلي اروح اشوف ابو صابر صار آدمي بعده؟ ،
وصل للمدرسة لگه هالمدرسة مليانه بشر ، بيها طلاب و معلمين و بالصدفة كان مدير المدرسة اسمه استاذ ابو صابر ، كالهم عمي وين الزمال مالتي ابو صابر ، گالوله المعلمين عمي احترم نفسك ولاتغلط…. ابو صابر هذا مدير المدرسة ،
گال هااا والنوب صاير مدير. فوگاها….،
صيحولياه ، إجه المدير كاشخ و لابس قاط ورباط ، گاله تفضل عمي ، گاله ها ولك ابو صابر ما عرفتني نسيت شگد چنت أُحمِّل عليك ، واترسلك العليجة شعير ، گاله عمي انت مخبل شبيك ، گاله ولك ابو صويبر شنهي هذا الغاط والرباط خلنّك تحچي وياي هيچ بعده جلالك عندي ،
المدير. استغرب..من هالكلام …وانفعل وصار عصبي ، گاله عمي روح منا لا ابتلي بيك ، گاله خايب كلش سويت روحك ما تعرفني ، ولك موش حتى رشمتك بعدني ضامها الك ، المدير انحرج وضاج ، حط على صاحبنا وطگه بدفرة على صدرة ، فقد الوعي ، اجوه المعلمين ذبوا عليه ماي و فرچوله ، گعد ، گالهم والله هو صويحبي ، صحيح هندامه متبدل لابس قاط ابدال الجلال ، بس اعرفه من زگطته هيه هيه.
عمي على كيفكم وإذا لبستوا قاط ورباط تره نعرفكم من الزگطه ……حتى لو بدلتو الجلال بالقوط
ابو صابر يبقى ابو صابر حتى لو بدل ( إجلاله )
( جلاله. .كلمه شعبيه وتعني القماش فوق ظهر الحمار ) ..

والحليم تكفيه الاشاره!!!!!